Tetun: Maluk sira, imi hatene ka la’e? Iha Marsu 2019, IJGlobal anúnsia iha Singapura katak Portu Tibar nu’udar Mellór Projetu Parseria Públiku Privada iha rejiaun Ázia-Pasífiku iha tinan 2018. IJGlobal mak organizasaun finanseiru mundiál ne’ebé trata projetu infraestrutura sira iha nivel internasionál.

Rekoñesimentu internasionál husi IJGlobal ne'e motiva Oitavu Governu Konstitusionál hodi diversifika liután investimentu estratéjiku sira iha área sira seluk ne’ebé liga ho kapitál umanu hanesan saúde no edukasaun hodi mellora kondisaun moris sidadaun nian nomós investimentu estratéjiku iha setór produtivu sira ne’ebé produs rikeza, bele hatama reseitas ba Estadu no kria kampu traballu ba Timoroan sira. To’o iha fulan-abril nia rohan, progresu konstrusaun Portu Tibár atinji ona 80% no tuir planu Portu ne’e sei hahú halo operasaun iha fulan-novembru tinan ne'e. Iha semana hirak liubá, Membrus Komisaun Inter-Ministeriál hamutuk ho Diretór PMU Portu Tibar, Rui Soares, akompaña Primeiru-Ministru Jenerál Taur Matan Ruak iha serimónia lansamentu deskargamentu ekipamentus Ship-to-Shore no Rubber Tyred Gantry Cranes ne’ebé to’o ona iha Portu Tibar. Instalasaun ba ekipamentus hirak ne’e hahú ona no sei ramata iha semana hirak tuir-mai.

Ekipamentus ba deskarga no karrega kontentór ne’e sei fasilita movimentu importasaun no esportasaun sasán sira, redus atrazu, kustu tranzasaun inklui tempu libertasaun kontentór. Efisiénsia hirak ne'e sei ajuda Governu liuhusi Ministériu Finansas atu kolekta reseitas ho lailais, justu no transparente. ***